११ साउन काठमाडौँ । मोबाइलको कल बाईपास (भीओआईपी) सञ्चालन गरेको आरोपमा २ जनालाई प्रहरीले आज पक्राउ गरेको छ । यस मुद्वामा पक्राउ पर्नेहरुमा सिन्धुपाल्चोक लिशंखुपाखर गाउँपालिका–५ घर भई हाल काठमाडौं बनस्थली बस्ने ४० वर्षीय भुपेन्द्र श्रेष्ठ र झापा गौरीगञ्ज गाउँपालिका–४ घर भई हाल काठमाडौं कपन बस्ने २४ वर्षीय खुम प्रसाद गिरी रहेका प्रहरीले पुष्टि गरेको छ ।
अनुमतिपत्र नलिई गैरकानूनी रुपमा रुमा भित्रबाट भीओआइपी कल सञ्चालन गरिरहेको भन्ने सूचनाको आधारमा नेपाल टेलिकम र एनसेल प्रालि समेतको प्राविधिक सहयोग र समन्वयमा केन्द्रीय अनुसन्धान ब्यूरो सीआईबीबाट खटिएको टोलीले उनीहरुलाई पक्राउ गरेको हो ।
काठमाडौँ खरिबोटबाट राउटर १ थान, ८ पोर्टको भीओआइपी गेटवे १ थान, इन्भर्टर १ थान, ब्याट्री १ थान, मल्टिप्लग १ थान, नेपाल टेलिकमको सीमकार्ड १ थान र एनसेलको सिमकार्ड ९ थान बरामद भएको छ ।उनीहरूलाई ऐन, २०५३ अन्तर्गतको कसूरमा जिल्ला अदालत काठमाडौंबाट ५ दिन म्याद लिई अनुसन्धान अघि बढाइएको छ ।
