२६ पुस काठमाडौँ । गोरखा जिल्लामा १३औँ राष्ट्रपति रनिङ शिल्ड प्रतियोगिता २०८२ सम्पन्न भएको छ । यस जिल्ला स्तरीय प्रतिस्पर्धामा पालुङटार नगरपालिका प्रथम भएको छ। पालुङटारले ८ स्वर्ण, ५ रजत र ३ कास्य पदक जित्दै कुल १६ पदकसहित शीर्ष स्थान हासिल गरेको हो।
दोस्रो स्थानमा सिरानचोक गाउँपालिका रहँदा उसले ५ स्वर्ण, १० रजत र ६ कास्य गरी कुल २१ पदक जितेको छ। यस्तै, ५ स्वर्ण, २ रजत र ६ कास्यसहित बारपाक सुलिकोट गाउँपालिका तृतीय भएको छ।
प्रतियोगितामा भीमसेन थापा गाउँपालिका चौथो, अजिरकोट गाउँपालिका पाँचौँ र शहीद लखन गाउँपालिका छैटौँ स्थानमा सीमित भए। गोरखा नगरपालिका सातौँ स्थानमा रहँदा धार्चे, गण्डकी र आरुघाट गाउँपालिकाले क्रमशः आठौँ, नवौँ र दसौँ स्थान हासिल गरेका छन्। चुमनुब्री गाउँपालिका भने यसपटक पदकविहीन रह्यो।
जिल्ला स्तरीय प्रतियोगिताबाट उत्कृष्ट प्रदर्शन गरेका खेलाडी र टिम अब प्रदेश स्तरीय राष्ट्रपति रनिङ शिल्ड प्रतियोगिताको तयारीमा जुट्ने भएका छन्। आयोजकका अनुसार जिल्लाबाट छनोट भएका खेलाडीलाई थप प्रशिक्षण र व्यवस्थापनसहित प्रदेशस्तरीय प्रतिस्पर्धामा प्रतिस्पर्धी बनाइनेछ।
स्थानीय तहका जनप्रतिनिधि र खेलकुदकर्मीहरूले राष्ट्रपति रनिङ शिल्डले विद्यालय तहबाटै खेलकुद प्रतिभा पहिचान र विकासमा महत्वपूर्ण योगदान पुर्याएको भन्दै आगामी प्रदेश प्रतियोगितामा गोरखाको प्रदर्शन अझ सशक्त हुने विश्वास व्यक्त गरेका छन्।
