५ भदौ काठमाडौँ । आज बिहान पोखराबाट काठमाडौंका लागि उडेको बुद्ध एयरको जहाज भैरहवा अवतरण गरिएको छ । उक्त जहाजले ७२ जना यात्रु लिएर बिहान उडेको पनि मौसम समस्याका कारण काठमाडौँमा अवतरण गर्न नसके पछि भैरहवा पुगेर अवतरण गरेको पोखरा विमानस्थलले जनाएको छ ।
आज बिहान ७:२५ मा उड्ने समय तालिका भए पनि ९:१५ मा काठमाडौं उडेको थियो । काठमाडौंको मौसम खराब हुँदा करिब २० मिनेट आकाशमा घुमेर भैरहवा अवतरण भएको हो ।
बुद्धको उडान नम्बर ६६४ को एटीआर ७२ जहाज काठमाडौंका लागि उडे पनि भैरहवा अवतरण भएको पोखरा विमानस्थलकी सूचना अधिकारी जसोदा रेग्मीले जानकारी दिइन् ।
अहिले यात्रु भैरहवा विमानस्थलमा रहेको र काठमाडौंको मौसम खुलेलगत्तै उडान हुने जानकारी दिइएको यात्रु टीका रेग्मीले बताए । काठमाडौं अवतरण नभएपछि डाइभर्ट गरेर बिहान १०:२० मा भैरहवा अवतरण गरेको रेग्मीले जानकारी दिए । अब माैसम खुल्ने बितिकै उक्त जहाज काडमाडाैँ उडाउने बताए ।
