७ असोज काठमाडौँ । भक्तपुरको आफ्नै घरबाट मेडिकल व्यवसायी दुर्गा प्रसाई पक्राउ परेपछि झापामा उनका समर्थकले ३ ट्रकमा आगजनी गरेका छन् ।
प्रसाईका समर्थकले गए राती ११ बजे बिरिङ पुल नजिकै युपी–५७ एटी–४४९३ नम्बरको मालबाहक ट्रकमा र आज बिहान ३ बजेतिर बिर्तामोड नगरपालिका–६ गिरिबन्धु टि–स्टेट नजिक डब्लूबी–७३ ई–३०५७ नम्बरको मालबहाक ट्रकमा आगजनी गरेका थिए । अर्काे फेरी झापाको धाइजनमा डब्लूबी–७३ ई–३०५६ नम्बरको भारतीय ट्रकमा आगजनी भएको छ ।
चार पाँच जनाको समूहमा आएका अज्ञात समूहले आगजनी गरी फरार भएका हुन् । बिर्तामोड नगरपालिकाको दमकलले आगो निभाएको प्रहरीले जनाएको छ ।
६ वटा मोटरसाइकलमा आएका १२ जनाको समुहले ट्रकमा आगजनी गर्दा चालक समेत घाइते भएका छन् । शरीरको केही भागमा आगोले पोलेको र घाइतेको पहिचान नखुलेको बताए । उनको स्थानीय अस्पतालमा उपचार भईरहेको प्रहरीले बताए ।
