२० असोज काठमाडौँ । केही दिन अघि अबिरल बर्षासंगै आएको झ्याप्ले खोला पहिरोमा परेर गोरखाका ५ जनाको मृत्यु भएको थियो । उक्त ५ जना मध्य आज २ जनाको परिवारलाई जनही २ लाख ५० हजार रकम हस्तान्तरण गरिएको हो। जिल्ला प्रशासन कार्यालयका प्रमुख जिल्ला अधिकारी भोला दाहाल सहितको टोलीले पिडित परिवारको घरमा पुगी चेक हस्तान्तरण गरिएको थियो ।
गोरखाको लापु बेशीबाट काठमाडौंका लागि गएको गोरखा दरौदी यातायात सेवा कम्पनी प्रालिको ना ४ ख २२७० नम्बरको बस उक्त पहिरोमा पर्दा गोरखाका ५ जनाले ज्यान गुमाएका थिए । ज्यान गुमाएका मध्य बसका धनी तथा चालक भिमसेन थापा गाउँपालिका–४ धावाका मदन परियार र सोही सवारीका सहचालक गण्डकी गाउँपालिका–४ फुजेलका नवराज अधिकारीको परिवारलाई जनही २ लाख ५० हजारका दरले राहत रकम उपलब्ध गराएको प्रमुख जिल्ला अधिकारी दाहालले बताउनुभयो ।
उक्त दिएको रकम संघीय सरकार मार्फत २ लाख र प्रदेश सरकार मार्फत ५० हजार गरी २ लाख ५० हजार रुपैयाँ उपलब्ध गराइ दिएको बताउनु भयो । तेही बस र पहिरोमा मृत्यु हुने उत्तरी गोरखाको धार्चे गाउँपालिका–७ खानिगाउँका चुकबहादुर गुरुङको परिवारलाई दसैं लगत्तै र अर्का नवराज पन्त र विनय भट्टराई बसाई सराई गरी चितवन गएकोले चितवन मार्फत रकम उपलब्ध हुने पनि प्रमुख जिल्ला अधिकारी दाहालको भनाई छ । उक्त रकम हस्तान्तरणमा सोही गाउँपालिकाका अध्यक्ष गोरखा जिल्लाका प्रहरी प्रमुख लगायतको उपस्थिति थियो ।
