१७ वैशाख काठमाडौं । त्रिभुवन विश्वविद्यालय त्रिवि का शीर्ष तीन पदाधिकारीहरूले सामूहिक रूपमा राजीनामा दिएका छन्। उपकुलपति प्रा.डा. दीपक अर्याल, शिक्षाध्यक्ष प्रा.डा. खड्ग केसी र रजिस्ट्रार प्रा.डा. केदार रिजाल ले बुधबार आफ्नो पदबाट राजीनामा दिएका हुन्।उनीहरूले कर्मचारीमार्फत् कुलपतिसमेत रहेका प्रधानमन्त्री बालेन्द्र शाह लाई राजीनामा बुझाउनुका साथै ह्वाट्सएपमार्फत् प्रधानमन्त्रीको सचिवालयमा पनि पत्र पठाएको जनाइएको छ।
स्रोतका अनुसार सरकारले हालै विश्वविद्यालय सम्बन्धी अध्यादेश ल्याएर राष्ट्रपतिसमक्ष पेस गरेको छ। सोही अध्यादेश कार्यान्वयनका क्रममा नयाँ नेतृत्वलाई काम गर्न सहज वातावरण सिर्जना गर्न आफूहरूले पद त्यागेको तीनै पदाधिकारीको भनाइ छ।
“सरकारले अघि सारेको नयाँ नीतिगत व्यवस्थालाई सहज रूपमा लागू गर्न र संक्रमणकालीन अवस्थालाई सरल बनाउन हामीले मार्ग प्रशस्त गरेका हौं,” एक पदाधिकारी निकट स्रोतले जनाएको छ।
शिक्षा क्षेत्रमा सुधारको बहस चर्किरहेका बेला आएको यो निर्णयलाई महत्त्वपूर्ण रूपमा हेरिएको छ। लामो समयदेखि त्रिविमा प्रशासनिक सुधार, पारदर्शिता र संरचनागत परिवर्तनको माग उठ्दै आएको थियो।यसैबीच, अध्यादेशमार्फत् विश्वविद्यालय सञ्चालन प्रणालीमा व्यापक फेरबदल गर्ने तयारी गरिएको छ। सरकारले नयाँ ढाँचाअनुसार विश्वविद्यालय व्यवस्थापनलाई थप प्रभावकारी बनाउने दाबी गरेको छ।
