२२ वैशाख काठमाडौँ । आइतबार पनि ओपीडी बन्द गर्ने निर्णयपछि सोमबार बिरामीको चाप, महँगो शुल्क तिरेर निजी अस्पताल जान बाध्य दुई दिनको सार्वजनिक बिदाका कारण देशका ठूला सरकारी अस्पतालहरूमा सेवा प्रवाह अस्तव्यस्त भएको छ। शनिबारको नियमित बिदासँगै आइतबार पनि ओपीडी (बहिरंग सेवा) बन्द गर्ने निर्णय गरिएपछि सोमबार अस्पतालहरूमा बिरामीको अत्यधिक चाप देखिएको हो।
विशेषगरी काठमाडौंका प्रमुख सरकारी अस्पतालहरूमा बिहानैदेखि लामो लाइन देखिएको थियो। समयमै उपचार नपाउँदा बिरामीहरू घण्टौँ लाइनमा बस्न बाध्य भएका थिए भने धेरैजसो बिरामी सेवा नपाई फर्किनुपरेको गुनासो गरेका छन्।अस्पताल प्रशासनले भने बिदापछि एकैपटक धेरै बिरामी आउँदा व्यवस्थापनमा समस्या भएको स्वीकार गरेको छ। चिकित्सक तथा स्वास्थ्यकर्मीको सीमित जनशक्तिका कारण सबै बिरामीलाई छिटो सेवा दिन कठिन भएको उनीहरूको भनाइ छ।
सरकारी अस्पतालमा समयमै सेवा नपाएपछि धेरै बिरामी निजी अस्पतालतर्फ जान बाध्य भएका छन्। तर निजी अस्पतालमा महँगो शुल्क तिर्नुपर्ने भएकाले सर्वसाधारण थप मारमा परेका छन्। “सरकारी अस्पतालमा पालो नै आएन, अन्ततः निजी अस्पताल जानुपर्यो,” एक बिरामीका आफन्तले बताए, “तर त्यहाँको शुल्क निकै महँगो छ।”
स्वास्थ्य क्षेत्रका जानकारहरूले यस्तो अवस्था दोहोरिन नदिन बिदाका दिन पनि आकस्मिक बाहेक केही ओपीडी सेवा सञ्चालन गर्ने व्यवस्था गर्नुपर्ने सुझाव दिएका छन्।साथै, बिरामीको चाप व्यवस्थापन गर्न जनशक्ति र सेवा विस्तार आवश्यक रहेको उनीहरूको भनाइ छ।सरकारले भने सेवाग्राहीलाई सहज सेवा उपलब्ध गराउने विषयमा आवश्यक समन्वय र सुधारका कदम चालिने जनाएको छ।
