२९ वैशाख काठमाडौँ । नेकपा (एमाले) का सांसद गुरु बरालले सरकारको नीति तथा कार्यक्रम प्रस्तुत भइरहँदा प्रधानमन्त्रीको व्यवहारप्रति असन्तुष्टि जनाएका छन्। प्रतिनिधिसभाको बैठकमा आफ्नो धारणा राख्दै सांसद बरालले प्रधानमन्त्रीको सदनप्रतिको जिम्मेवारी र प्रस्तुतिमाथि प्रश्न उठाएका हुन्।
सांसद बरालले नीति तथा कार्यक्रमजस्तो महत्वपूर्ण संवैधानिक दस्तावेज प्रस्तुत भइरहेका बेला प्रधानमन्त्रीको भूमिका थप जिम्मेवार र मर्यादित हुनुपर्ने बताएका छन्। उनले प्रधानमन्त्रीले सदनमा उपस्थित रहने शैली, समय व्यवस्थापन तथा प्रस्तुतीकरणप्रति असन्तुष्टि व्यक्त गर्दै बीचमै सदन छाडेर हिँड्ने प्रवृत्ति उपयुक्त नभएको टिप्पणी गरे।
उनले औपचारिक राज्य समारोह तथा संसदीय कार्यक्रमहरूमा प्रधानमन्त्रीको पहिरन र प्रस्तुतिको विषयसमेत उठाउँदै औपचारिक कार्यक्रममा अनौपचारिक गेटअपमा उपस्थित हुनु मर्यादाअनुकूल नदेखिएको बताएका छन्। सांसद बरालले राज्यका उच्च पदाधिकारीले सार्वजनिक कार्यक्रममा प्रस्तुत हुने शैलीले संस्थागत गरिमा झल्काउनुपर्ने धारणा राखे।
उनका अनुसार, सरकारको नीति तथा कार्यक्रम संसदमा प्रस्तुत गरिँदा प्रधानमन्त्रीको सक्रिय उपस्थिति, गम्भीरता र उत्तरदायित्वले सकारात्मक सन्देश दिनुपर्ने भए पनि व्यवहारमा त्यसको अभाव देखिएको महसुस भएको छ।
सांसद बरालको उक्त अभिव्यक्ति पछि संसदमा केही समय चर्चा समेत भएको थियो। यद्यपि प्रधानमन्त्री पक्षबाट यस विषयमा तत्काल कुनै औपचारिक प्रतिक्रिया आएको छैन।सरकारको नीति तथा कार्यक्रममाथि संसदमा छलफल जारी रहेको अवस्थामा आएका यस्ता टिप्पणीहरूले राजनीतिक वृत्तमा थप बहसको विषय बनाएको छ।
