११ असोज काठमाडौँ । नेपाली कांग्रेसका निवर्तमान सभापति शेरबहादुर देउवा पक्षले गोरखा जिल्ला अधिवेशनको तयारीका विषयमा काठमाडौंमा बैठक गर्ने भएको छ। देउवा पक्ष गोरखाले काठमाडौंको बनस्थलीमा तयारी बैठक आयोजना गर्न लागेको हो।
आसन्न जिल्ला अधिवेशन तथा वडा अधिवेशनको तयारीलगायत संगठनका विभिन्न विषयमा बैठकमा छलफल हुने बताइएको छ। देउवा पक्षले असोज १५ गते वडा अधिवेशन गर्ने तयारी गरेको छ।वडा अधिवेशनको तयारी, जिल्ला अधिवेशनको व्यवस्थापन, संगठन विस्तार तथा स्थानीय तहमा पार्टी गतिविधिलगायत विषयमा बैठकमा छलफल हुने जनाइएको छ।यसैबीच, देउवा पक्षले कांग्रेस नेता भूगोल थापालाई गोरखा संयोजकको जिम्मेवारी दिएको छ। थापाको संयोजनमा गोरखामा पार्टीको संगठनात्मक गतिविधि तथा अधिवेशन तयारीलाई अघि बढाउने तयारी गरिएको छ।
यता, गगन थापा नेतृत्वको नेपाली कांग्रेसले भने असोज ३ र ४ गते नै वडा अधिवेशन सम्पन्न गरिसकेको बताइएको छ। दुई पक्षले फरक–फरक मितिमा वडा अधिवेशनको प्रक्रिया अघि बढाएपछि गोरखा कांग्रेसको अधिवेशन प्रक्रिया थप चासोको विषय बनेको छ। काठमाडौंमा हुने तयारी बैठकले देउवा पक्षको आगामी जिल्ला अधिवेशनको रणनीति, वडा तहको संगठनात्मक तयारी तथा प्रतिनिधि छनोटलगायत विषयमा आवश्यक निर्णय गर्ने बताइएको छ।
गोरखा कांग्रेसमा अधिवेशनलाई लिएर दुवै पक्षले आ–आफ्नो संगठनात्मक गतिविधि तीव्र बनाउँदै लगेका छन्। अब हुने वडा अधिवेशन र त्यसपछि जिल्ला अधिवेशनको प्रक्रियाले जिल्लामा कांग्रेसको आन्तरिक संगठनात्मक संरचनालाई थप स्पष्ट पार्ने देखिएको छ।
