१९ असोज काठमाडौं । नेपाली कांग्रेसको १५औँ महाधिवेशन काठमाडौंको खुलामञ्चमा जारी छ। महाधिवेशनमा गोरखाबाट ठूलो संख्यामा नेता, कार्यकर्ता तथा महाधिवेशन प्रतिनिधिहरू सहभागी भएका छन्। गोरखाबाट सहभागी नेताहरूले पार्टीको विभिन्न तहमा निर्वाचित हुँदै केन्द्रसम्मको राजनीतिक यात्रा अघि बढाउने तयारी गरेका छन्।
महाधिवेशनमा गोरखाबाट विभिन्न कोटा तथा खुला समूहबाट पदाधिकारी र केन्द्रीय सदस्य पदमा उम्मेदवारी दिने तयारीमा नेताहरू देखिएका छन्। गोरखाबाट आएका नेताहरूले वडा, गाउँपालिका तथा नगरपालिका, प्रदेशसभा क्षेत्र, प्रतिनिधिसभा क्षेत्र, जिल्ला र प्रदेश तह हुँदै केन्द्रीय नेतृत्वमा आफ्नो दाबी प्रस्तुत गर्न लागेका हुन्।
गण्डकी प्रदेशका मुख्यमन्त्री तथा नेपाली कांग्रेसका केन्द्रीय सदस्य सुरेन्द्रराज पाण्डेले महाधिवेशनमा उपसभापति पदमा उम्मेदवारी घोषणा गरिसकेका छन्। पाण्डेले पार्टीलाई थप एकताबद्ध, सुदृढ र समयानुकूल बनाउँदै अघि बढाउन आफूले भूमिका खेल्ने बताएका छन्।त्यस्तै, मुस्लिम कोटाबाट सहमहामन्त्री पदमा अब्दुल सत्तारले उम्मेदवारी दिने तयारी गरेका छन्। कांग्रेसका केन्द्रीय सदस्यसमेत रहेका सत्तारले मुस्लिम क्लस्टरतर्फबाट सहमहामन्त्रीमा प्रतिस्पर्धा गर्ने घोषणा गरेका छन्।
केन्द्रीय सदस्य खुलातर्फ गण्डकी प्रदेशका पूर्वसांसद प्रकाशचन्द्र दवाडीले उम्मेदवारी दिने तयारी गरेका छन्। त्यसैगरी इन्जिनियर तथा पालुङटार नगरपालिकाका पूर्वमेयर दीपकबाबु कँडेल पनि केन्द्रीय सदस्य पदमा उम्मेदवार बन्ने तयारीमा छन्।
खस आर्य महिला कोटाबाट शोभा अधिकारीले केन्द्रीय सदस्य पदमा उम्मेदवारी दिने घोषणा गरेकी छन्। कांग्रेस गोरखाबाट १५औँ महाधिवेशनका लागि सर्वसम्मत महाधिवेशन प्रतिनिधि चयन भएकी अधिकारी लामो समयदेखि राजनीतिक, साहित्यिक तथा प्राज्ञिक क्षेत्रमा सक्रिय रहँदै आएकी छन्।त्यस्तै, दलित कोटाबाट ईश्वरबहादुर परियारले केन्द्रीय सदस्य पदमा उम्मेदवारी दिने तयारी गरेका छन्।
गोरखाबाट विभिन्न पदमा उम्मेदवारीको तयारीमा रहेका नेताहरूले आफ्नो राजनीतिक यात्रालाई स्थानीय तहबाट क्रमशः क्षेत्र, जिल्ला, प्रदेश हुँदै केन्द्रीय नेतृत्वसम्म पुर्याउने प्रयास गरिरहेका छन्। वडा तहदेखि संगठनमा सक्रिय रहँदै आएका नेता तथा कार्यकर्ताहरू महाधिवेशनमार्फत केन्द्रमा आफ्नो उपस्थिति बलियो बनाउने तयारीमा छन्।
नेपाली कांग्रेसको १५औँ महाधिवेशन असोज १६ देखि १९ गतेसम्म सञ्चालन हुने कार्यतालिका रहेको छ। केन्द्रीय निर्वाचन समितिले वडा, गाउँ–नगर, प्रदेशसभा क्षेत्र, प्रतिनिधिसभा क्षेत्र, जिल्ला र प्रदेश अधिवेशन सम्पन्न गर्दै केन्द्रीय महाधिवेशनमा पुग्ने कार्यतालिका सार्वजनिक गरेको थियो।
गोरखाबाट विभिन्न पदमा उम्मेदवारी दिने तयारीमा रहेका नेताहरूका कारण महाधिवेशनमा जिल्लाको राजनीतिक गतिविधि पनि चासोको विषय बनेको छ। खुलामञ्चमा जारी महाधिवेशनसँगै उम्मेदवारी, प्रतिनिधिसँगको भेटघाट तथा नेतृत्वका लागि आन्तरिक छलफलसमेत तीव्र बनेको छ।
