२४ असोज गोरखा । गोरखा जिल्लाका दुई युवा आशा उपरकोटी र विनय लामिछाने नेपाल न्याय सेवाअन्तर्गत सरकारी वकिल समूहको शाखा अधिकृत पदमा सिफारिस भएका छन्।
गोरखा नगरपालिका निवासी उपरकोटी र बारपाक सुलिकोट गाउँपालिका निवासी लामिछाने लोक सेवा आयोगको प्रतिस्पर्धात्मक छनोट प्रक्रियामा सफल हुँदै सरकारी सेवामा प्रवेशका लागि सिफारिस भएका हुन्।
लोक सेवा आयोगले नेपाल न्याय सेवाअन्तर्गत न्याय, कानून तथा सरकारी वकिल समूहमा राजपत्राङ्कित तृतीय श्रेणी, शाखा अधिकृत वा सो सरह पदका लागि एकमुष्ट योग्यताक्रमअनुसार ६० जना उम्मेदवारलाई सिफारिस गरेको छ। आयोगले उक्त सिफारिससम्बन्धी सूचना २०८३ असोज २३ गते प्रकाशित गरेको हो।
आयोगले लिखित परीक्षा, अन्तर्वार्ता तथा सम्बन्धित छनोट प्रक्रियाबाट प्राप्त अङ्कका आधारमा योग्यताक्रम निर्धारण गरी उम्मेदवारहरूलाई सम्बन्धित सेवा तथा समूहमा सिफारिस गरेको जनाएको छ। सोही सिफारिस सूचीमा गोरखाका उपरकोटी र लामिछाने सरकारी वकिल समूहमा परेका हुन्।
सरकारी वकिलले राज्यका तर्फबाट अभियोजनसम्बन्धी कार्य गर्ने, प्रचलित कानुनको कार्यान्वयनमा योगदान पुर्याउने तथा न्याय प्रशासनलाई प्रभावकारी बनाउन महत्वपूर्ण भूमिका निर्वाह गर्छन्। सरकारी वकिलको जिम्मेवारीमा रहने अधिकारीले राज्यका तर्फबाट अदालतमा अभियोजनसम्बन्धी काम गर्नुका साथै कानुनी शासनको प्रवर्द्धनमा योगदान पुर्याउँछन्।
लोक सेवा आयोगको प्रतिस्पर्धात्मक छनोट प्रक्रियाबाट सरकारी वकिल समूहको शाखा अधिकृत पदमा सिफारिस भएसँगै उपरकोटी र लामिछानेले सार्वजनिक सेवामा काम गर्ने अवसर प्राप्त गरेका छन्। उनीहरूको सिफारिसले गोरखा जिल्लाको प्रतिनिधित्वसमेत न्याय सेवामा भएको छ।
सरकारी सेवामा प्रवेशका लागि प्रतिस्पर्धात्मक परीक्षा उत्तीर्ण गरी सिफारिस हुनुलाई युवाहरूको मेहनत, लगनशीलता र सार्वजनिक सेवाप्रतिको प्रतिबद्धतासँग जोडेर हेरिएको छ।
