१७ असाेज काठमाडाैँ । गोरखा जिल्लाको उत्तरी चुमनुव्री गाउँपालिकाकाे स्थानीय बासिन्दाहरूलाइ आजबाट चीनको सीमा प्रवेश अनुमती पत्र बोर्डर पास बुक वितरण हुने भएको छ । वडा नम्वर ३ फिलिमको सिर्दिवास स्थित इलाका प्रशासन कार्यालयबाट उनीहरुलाई पास वितरण हुने प्रमुख जिल्ला अधिकारी दिनेशसागर भुसालले बताए ।
पास वितरणका लागी सहायक प्रमुख जिल्ला अधिकारी पुष्कर रानासहितको टोली सोमवार नै सिर्दिवास पुगेको छ । नासु बिश्व रोका मगर र कम्प्यूटर अपरेटर सिता गुरुङ टोलीमा समावेश छन् । आज सिर्दिबास आइपुग्यौ,’ सहायक प्रमुख जिल्ला अधिकारी रानाले भने, ‘भोली बिहानबाट पास वितरण शुरु गर्छौ ।
गृहमन्त्रालयले पठाएको डिजाइन अनुसार पास छपाइ गरिएको बताइएको छ । उक्त पासको म्याद एक बर्षको हुने सहायक प्रजिअ रानाले बताए । ‘हामीले बितरण गर्ने पासको म्याद एक बर्षको हुन्छ, त्यसपछि फेरी रिन्यू गर्नुपर्ने हुन्छ,’ उनले भने । यसअघि पास लिएकाहरुले पनि नयाँ पास लिनुपर्ने उनले बताए ।
बिगत चार बर्षदेखि बन्द अवस्थामा रहेको तिब्बत नाका चीन सरकारले खुल्ला गरिसकेको छ । पास उपलब्ध गराइदिन आग्रह गर्दै उनीहरु पटक पटक गृहमन्त्रालय समेत धाएका थिए ।गृहमन्त्रालयले निर्देशन दिएपछि पास वितरण गर्न लागिएको हो । सीमाबाट ३० किलोमिटर आसपासका बासिन्दाले मात्र पास पाउने पालिकाले जनाएको छ ।
