१७ माघ काठमाडौँ । त्रिभुवन विश्वविद्यालय अन्तर्गतको परीक्षा नियन्त्रण कार्यालय, बल्खुको वेबसाइट ह्याक भएको छ । उक्त वेबसाइट ह्याक गर्ने व्यक्ति कक्षा १२ मा अध्ययनरत विद्यार्थी रहेको पाइएको छ । मङ्गलवार राति ह्याक भएको उक्त वेबसाइट रिडाइरेक्ट भएर रोहित रोकाया नामको फेसबुक अकाउन्टमा पुगिरहेको थियो ।
यस्तोमा कसैले साइटलाई जानीजानी रोहितको अकाउन्टमा रिडाइरेक्ट गरेको हो कि भन्ने आशंका त्रिविले गरेको छ ।केही समयपछि नै उक्त अकाउन्टबाट साइट ह्याक गरेको भन्ने पोस्ट अपलोड भयो । उक्त पोस्टमा लेखिएको छ, “हिजोदेखि टीयूले अनलाइन सेवा सुरु गरेसँगै यसले टीयूको वेबसाइटमा अट्याक सर्फेस पनि बढाएको छ ।
अब टीयूले अनलाइन प्रणालीबाट आएका लाखौं कागजपत्रलाई सुरक्षित राख्नुपर्ने हुन्छ । त्यसैले टीयूले कुनै पनि सफ्टवेयर बनाउँदा सुरक्षाको पाटोलाई पनि विशेष महत्व दिन अत्यन्त जरुरी छ ।उक्त पोस्टमा ह्याक गर्नु अवैध र अनैतिक भएको समेत उल्लेख छ ।
त्रिविको वेबसाइट ह्याक घटनामा संलग्न व्यक्ति नाबालक रहेको पाइएकाले उनको नाम र तस्वीर समाचारबाट हटाइएको छ ।
