२० वैशाख काठमाडौँ । गोरखाको आरुघाट गाउँपालिका स्वास्थ्य शाखाको आयोजनामा भएको अन्तरपालिका स्तरीय स्वास्थ्यकर्मीहरुको मैत्रीपूर्ण फुटबल प्रतियोगिताको उपाधि गोरखा अस्पतालले हात पारेको छ । गोरखा जिल्लामा भएको प्रथम अन्तरपालिका स्तरीय स्वास्थ्यकर्मीहरुको मैत्रीपूर्ण फुटबल प्रतियोगिता हिजो सम्पन्न भएको हो ।
१३५ औ अन्तर्राष्ट्रिय श्रमिक दिवस अर्थात् ‘मे डे’ दिवसको अवसरमा आरुघाट स्वास्थ्य शाखाको आयोजनामा प्रतियोगिताको उपाधि गोरखा अस्पतालले जितेको छ । गोरखा जिल्ला भरका पालिकाको स्वास्थ्य शाखाको सहभागिता हुने भने प्रतियोगिता पालुङटार नगरपालिका बाहेक १० पालिका र गोरखा अस्पतालको एक टिम गरी जम्मा ११ टिमको सहभागिता रहेको थियो ।
उक्त प्रतियोगिताको आयोजनमा आरुघाट स्वास्थ्य शाखाको टिमलाई पराजित गर्दै गोरखा अस्पताल प्रथम भएको पालिकाका स्वास्थ्य शाखा प्रमुख प्रबिन थापाले जानकारी दिए । प्रतियोगितामा प्रथम हुने टिमले नगद रु १५ हजारसहित ट्रफी, मेडल र प्रमाण पत्र र द्वितिय हुने टिमले मेडल र प्रमाण पत्र पाएका थिए ।
प्रतियोगितामा स्वास्थ्यतर्फको कर्मचारीहरुको खेल भएकाले स्वास्थ्य क्षेत्र अन्तरगत गोरखा अस्पताल एक मात्र सरकारी अस्पताल भएकाले सहभागिता भएको र स्वास्थ्यकर्मी बीच मित्रता बढाउन साथै आगामी दिनमा स्वास्थ्य क्षेत्रमा एकता कायम गर्न प्रतियोगिता गरिएको पालिकाका स्वास्थ्य शाखा प्रमुख थापाले जानकारी दिए ।
यस प्रतियोगिता तथा कार्यक्रमको समापन गाउँपालिका स्वास्थ्य शाखा प्रमुख प्रबिन थापाको अध्यक्षता तथा गाउँपालिका अध्यक्ष राजु गुरुङको प्रमुख आतिथ्यतामा भएको थियो । यसैक्रममा स्वास्थ्य कार्यालय गोरखाका प्रमुख ऐनप्रसाद शर्मा, गाउँपालिकाका प्रमुख प्रशासकीय अधिकृत भिमसेन श्रेष्ठ लगायत विभिन्न व्यक्तीहरूको उपस्थिति रहेको थियो ।
