१७ जेठ काठमाडौँ । काठमाडौँको काभ्रेस्थली भेडीगोठ सरकारी धारा नजिक यात्रुवाहक हाइस गाडी दुर्घटना हुँदा एक जनाको मृत्यु पाँच जना घाइते भएका छन् ।
मृत्यु हुने धादिङ घर भई हाल काठमाडौँको तारकेश्वर–२ काभ्रेस्थली बस्ने २७ वर्षीया रमिता तोलाङ्गीको मृत्यु भएको जिल्ला प्रहरी परिसर, काठमाडौंले जनाएको छ । गम्भीर घाइते भएकी उनलाई उपचारका लागि लैजाँदै गर्दा बाटोमै मृत्यु भएको काठमाडौं परिसरका एसपी नवराज अधिकारीले जानकारी दिए ।
दुर्घटनामा सिन्धुली घर भई हाल काठमाडौँको तारकेश्वर–२ का गाडी चालक २६ वर्षीय सुशील दमाई गम्भीर घाइते भएका छन् । सहचालक २० वर्षीय कृष्ण तमाङ, यात्रुहरू २६ वर्षीय गोपाल दमाई, २५ वर्षीय टेकबहादुर मरस्याङ्दी र १८ वर्षीया पवित्रा तोलाङ्गी सामान्य घाइते भएका छन् ।
