२ पुस काठमाडौँ । पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेलाई हिरासत म्याद थपका लागि आज कास्की प्रहरीले अन्तिमपटक जिल्ला अदालतमा पेश गराएको छ ।
लामिछानेलाई अदालतमा उपस्थित गराएर थप ४ दिनको म्याद मागिने कास्की जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) वसन्तकुमार शर्माले बताए ।
यसअघि, मंसिर २७ गते सातौँपटक थप गरिएको ५ दिनको हिरासत म्याद गएराति समाप्त भएको थियो । प्रहरीका अनुसार, लामिछानेविरुद्ध अनुसन्धानका लागि आज आठौँपटक म्याद थप्ने प्रक्रिया अघि बढाइएको हो ।
सूर्यदर्शन सहकारी ठगी प्रकरणमा लामिछाने कात्तिक २ गते पक्राउ परेका थिए। तर, उनका व्यवसायिक साझेदार तथा गोर्खा मिडियाका सञ्चालक छविलाल जोशी भने यसअघि असोज ६ गते नै पक्राउ परिसकेका थिए । प्रहरीले लामिछानेसहित ५१ जना अभियुक्तविरुद्ध मुद्दा दर्ता गर्न राय दिएको छ ।
