१० माघ काठमाडौँ । भारतको महाराष्ट्रको जलगाउँमा हिजो बेलुका रेल दुर्घटना हुँदा कम्तीमा १२ जनाको मृत्यु र १० जना घाइते भएका छन् । १० जना घाइतेमध्ये चारजनाको अवस्था गम्भीर रहेको छ ।दुर्घटनामा नौ पुरुष र तीन महिलाको मृत्यु भएको जलगाउँका जिल्ला कलेक्टर आयुष प्रसादले द इन्डियन एक्सप्रेसलाई बताएका छन् ।
ज्यान गुमाउनेमध्ये ‘तीन नेपाली’ नागरिक हुन् । हालसम्म नेपाली नागरिकसहित सातजनाको शव पहिचान भइसकेको दैनिक भास्करले जनाएको छ ।दुर्घटनामा नेपालका ११ वर्षीय नन्दराम विश्वकर्मा, २३ वर्षीय लच्छीराम पासी र ४३ साल वर्षीया कमला भण्डारीको मृत्यु भएको जनाइएको छ । कमला भण्डारीको घर कैलालीको मोहन्याल गाउँपालिका–६ हो ।
लखनऊबाट मुम्बई जाँदै गरेको पुष्पक एक्सप्रेस रेलको एउटा डिब्बामा आगो लागेको हल्ला फैलिएको थियो । केही यात्रुहरु हतारहतार रेलबाट हाम फालेका थिए ।त्यसै बेला विपरीत दिशाबाट आउँदै गरेको कर्नाटक एक्सप्रेसले उनीहरूलाई किचेको हो । थप विवरणको अनुसन्धान भई रहेको छ ।
