२० माघ काठमाडौँ । ताप्लेजुङको पाथीभरा नो केबलकार भन्दै आन्दोलन सुरु भएको छ । आन्दोलन सुरु भए पछि बन्दकर्ता र प्रहरीबीच झापाको दमकमा झडप भएको हो । आज दिउँसो पूर्व पश्चिम राजमार्ग अन्तर्गत दमक–६ स्थित गणतन्त्र चोकमा संघीय लोकतान्त्रिक राष्ट्रिय मञ्चका अध्यक्ष कुमार लिङ्देनको नेतृत्वमा करिब सय जनाले टायर बालेर सडक अवरोध गरेका छन् ।
त्यसक्रममा प्रहरीले बन्दकर्तालाई नियन्त्रणमा लिन खोज्दा उनीहरूले प्रहरीमाथि ढुंगा हानेका थिए।ढुंगा प्रहारबाट मे १ च ५१६१ नम्बरको स्कोरपियोसहित केही सवारी साधनमा क्षति पुगेको छ। इलाका प्रहरी कार्यालय दमकले त्यसपछि केही बन्दकर्ताहरुलाई पक्राउ गरेपछि स्थिति तनावग्रस्त बन्यो र दुवै पक्षबीच झडप भएको थियो।
झडपका क्रममा प्रहरीले स्थितिलाई नियन्त्रणमा लिन तीन सेल अश्रुग्यास प्रहार गरेको प्रहरीले जनाएको छ। यसअघि आजै बिहान प्रहरीले दमकबाट बन्दकर्ताहरू पदम बेघा, धनकुमार योङहाङ र शुक्र लिम्बूलाई पक्राउ गरेका थिए । यसै क्रम घटना बढदै गएको छ ।
