८ चैत काठमाडौँ । चितवनको खैरहनी नगरपालिका वडा न –४ कंकाली टोलमा तीन वटा मोटरसाइकल आपसमा ठोक्किदा सात जना घाइते भएका छन् । आज कंकाली टोलको भित्री बाटोबाट आउँदै गरेको ना २ प ७४१ नम्बरको मोटरसाइकल र पिठुवाबाट गोठेश्वरतर्फ जाँदै गरेको बागमती प्रदेश ०३–००३ प ३३७२ नम्बरको मोटरसाइकल आपसमा ठोक्किई शिवालय चोकबाट वडा कार्यालय तर्फ जादै गरेको नम्बर प्लेट नभएको अन टेस्ट मोटरसाइकलसंग ठोक्किएको प्रहरी चौकी चैनपुरले जानकारी दिएको छ ।
दुर्घटनामा परी घाइते भएकाहरुको भरतपुरको एलाइभ अस्पतालमा उपचार भएको छ । घाइते हुनेहरुमा ना २ प ७४१ नम्बरको मोटरसाइकल चालक कालिका नगरपालिका–२ बस्ने वर्ष ६९ को उदय बहादुर बाँनिया, सोहि मोटरसाइकल पछाडि सवार खैरहनी–४ बस्ने वर्ष २८ की सरस्वती थिङ अधिकारी, उनको छोरा वर्ष ६ को सन्देश अधिकारी र देउरानीकी छोरी बर्ष ५ की सजिता अधिकारी रहेका छन् ।
त्यस्तै, बागमती प्रदेश ०३–००३ प ३३७२ नम्बरको मोटरसाइकल चालक रत्ननगर नगरपालिका–१५ बस्ने वर्ष ४० को देविन्द्र न्यौपाने र अन टेस्ट मोटरसाइकल चालक खैरहनी–४ बस्ने वर्ष ४६ को राजेन्द्र गिरि र सोहि मोटरसाइकल पछाडि सवार निजको छोरा वर्ष ६ को आयुष गिरी रहेका छन् । उनीहरुको उपचार भई रहेको छ ।
