उदयपुरका मालपोत कार्यालय प्रमुख दुविन्द्रप्रसाद बराल सवार जिप दुर्घटना भएको छ ।मदन भण्डारी लोकमार्गअन्तर्गत मुर्कुची–नेपालटार खण्डको नागबेलेस्थित ओरालो घुम्तीमा आज बिहान ७ः३० बजे भएको दुर्घटनामा परी चालकसहित ४ जना घाइते भएका छन् ।
मालपोत कार्यालयकै स १ झ ४८५ नं. को बोलेरो जिप सडकमा आफै अनियन्त्रित भएर दुर्घटना भएको प्रत्यक्षदर्शीले बताएका छन् ।
दुर्घटनामा परी चालक ५० वर्षीय जीतबहादुर कार्की, मालपोतकै खरिदार ३५ वर्षीय तेजनारायण साह, उदयपुरगढी गाउँपालिका ५ की ४० वर्षीया सरिता भण्डारी र उनकै छोरी १७ वर्षीया संरचना भण्डारी घाइते भएका छन् ।कार्यालयको काममा उदयपुरगढी गाउँपालिका गएर फर्कँदै गर्दा दुर्घटना भएको हो ।
घाइतेहरूको उद्धार गरी उपचारार्थ जिल्ला अस्पताल उदयपुरमा लगिएकोमा चालक कार्की र खरिदार साहको अवस्था गम्भीर रहेको छ ।उनीहरुलाई थप उपचारको लागि विराटनगर रिफर गरिएको छ ।
